Profillarda musiqa, yangi profillar, hadya mavzulari va boshqalar

Bugungi yangilanishda siz profilga musiqa qoʻshishingiz, birlamchi profil sahifasini tanlashingiz, kolleksiyalanadigan hadyalaringizga mos noyob chat mavzularini belgilashingiz, doʻstlaringizga hadyalarini yuksaltirishda yordam berishingiz va boshqalarni amalga oshirishingiz mumkin.

Profilingizda musiqa

Endi istalgan chatdagi audio fayllarni media pleyerda bir marta bosish orqali profilingizga qoʻshishingiz mumkin. Trek profilingizga qoʻshilgach, u rasmingiz ostidagi zamonaviy panelda koʻrinadi.

Profilingizga treklar qoʻshilganda u avtomatik ravishda avvalgi qoʻshiqlarni oʻz ichiga olgan pleylist yaratadi.

Profilingizga musiqa qoʻshish uchun media pleyerdagi “Profilga qoʻshish” tugmasini bosing yoki ushbu trekni tanlab, Saqlash… > Profil bandini bosing.

Android uchun yangi profil dizayni

Yaqinda oʻtkazilgan tanlov tufayli Android qurilmalaridagi profillar endi iOS'da birinchi boʻlib joriy etilgan zamonaviy yangi dizayn va varaqlash animatsiyalariga ega boʻldi.

Telegram muntazam ravishda dasturchilar, dizaynerlar, kontent yaratuvchilar va boshqalar uchun tanlovlar oʻtkazadi — ba’zilari esa Telegram jamoasiga qoʻshilish imkoniyatini ham beradi.

Birlamchi profil sahifasi

Endi siz profilingiz ochilganda birinchi boʻlib qaysi sahifa koʻrinishini tanlashingiz mumkin — bu orqali saqlangan hikoyalaringiz yoki hadya kolleksiyalaringizni yaxshiroq namoyish qilasiz.

Profilingizda birlamchi sahifani oʻzgartirish uchun Sozlamalar > Profilim rukniga kiring, sahifani bosib turing va Asosiy sahifa sifatida belgilash bandini tanlang.

Hadya mavzulari

2021-yildan boshlab Telegram foydalanuvchilari alohida chatlarga mavzularni qoʻllashi mumkin. Bugun biz Telegram hadyalari asosida yaratilgan oʻnlab yangi dinamik chat fon rasmlarini qoʻshmoqdamiz — egalari endi ularni istalgan shaxsiy chatda maxsus mavzu sifatida sozlashi mumkin.

Bu fon rasmlarini ochishning yagona yoʻli — hadyaga egalik qilish. Har bir fon rasmi hadya atributlariga asoslangan boʻlib, model va fon yordamida har bir kolleksiya uchun noyob mavzu hosil qiladi. Bitta hadya bitta chat uchun bitta mavzuni ochadi.

Hozirda bu Plush Pepes, Precious Peaches, Durov's Caps va Heart Lockets bilan ishlaydi.

Boshqa foydalanuvchilar uchun hadyalarni yuksaltirish

Endi siz boshqa birovning profilida yulduzlari kamroq boʻlsa yoki hadyani yuksaltirish mumkinligini bilmagan boʻlsa, hadyani yuksaltirish xarajatini qoplash uchun yulduzlar yuborishingiz mumkin. Agar foydalanuvchi keyinchalik hadyasini yuksaltirishga qaror qilsa, bu u uchun bepul boʻladi.

Yangi “Yuksaltirish mumkin” filtri yordamida yuksaltirish mumkin boʻlgan hadyalarni oson topish mumkin. Shuningdek, “Keyingi hadyani yuksaltirish” tugmasi bilan bir nechta hadyani ketma-ket yuksaltirishingiz mumkin.

Kolleksiyalanadigan hadyalarni ochishni yanada hayajonli qilish uchun dizaynerlarimiz yuksaltirish animatsiyasiga qoʻshimcha intriga qoʻshishdi.

Hadya qiymati

Foydalanuvchilar Telegram ichidagi Hadyalar marketpleysida kolleksiyalanadigan hadyalar bilan xavfsiz tarzda savdo qilishi mumkin.

Hadyaning atributlarini koʻrishda yangi “Qiymat” maydoni uning taxminiy qayta sotish narxini koʻrsatadi. Uni kengaytirib, shu kolleksiyadagi boshqa hadyalarning oʻrtacha sotilish narxi kabi qoʻshimcha statistikalarni koʻrishingiz mumkin.

Stikerlar mini ilovasi

Telegram foydalanuvchilari ichki muharrir yordamida maxsus stikerlar yaratishi va @Stickers boti orqali toʻplamlarni boshqarishi mumkin.

Bugundan boshlab yangi @Stickers mini ilovasi yordamida stiker va emojilar yaratishingiz, toʻplamlaringizni boshqarishingiz va batafsil foydalanish statistikasini koʻrishingiz mumkin.

Istalgan foydalanuvchi Telegramning stiker va emojilar uchun ochiq platformasi orqali maxsus san’at asarlarini yaratishi, yuborishi va ulashishi mumkin.

Yoz tugadi. Ishga qaytamiz.

2025-yil 31-avgust
Telegram jamoasi