Рэдактар стыкераў – стварайце свае стыкеры

Пачынаючы ад сёння вы зможаце ствараць стыкеры і наборы стыкераў з любога відарысу з дапамогай магутнага рэдактара — не выходзячы з Telegram.

Рэдактар стыкераў

Проста вазьміце любое фота і дадайце надпісы, малюнкі – або безліч анімаваных стыкераў, эмодзі і анімацый, якія ўжо загружаны на платформу. Пераўтварыць коцікаў у твор мастацтва не было так проста ніколі ў гісторыі чалавецтва (і катавецтва таксама).

Адным дотыкам вы можаце выразаць аб'екты і выдаляць фон. Таксама вы можаце ўручную сцерці або аднавіць любыя часткі вашага відарыса – або дадаць контур да вашага новага стыкера.

Каб пачаць ствараць стыкеры, адкрыйце панэль стыкераў у полі ўводу паведамлення ў любым чаце, і націсніце кнопку (+).

Дадаванне стыкераў у набор

Як скончылі, можаце проста адправіць стыкер, або стварыце набор стыкераў, каб вашымі смешнымі коцікамі маглі карыстацца і вашы сябры ў сваіх чатах.

Каб дадаць стыкер у набор, выберыце эмодзі, каб апісаць эмоцыю, якую гэты стыкер мусіць перадаваць. Telegram таксама будзе ўжываць штучны інтэлект, каб прапанаваць вам эмодзі на аснове самога стыкера — напрыклад, эмодзі ката, сабакі або машыны.

У Telegram эмодзі можна карыстацца, каб хутка знайсці стыкер. Калі вы ўводзіце эмодзі, Telegram аўтаматычна прапануе вам адпаведныя стыкеры, якія можна адразу жа адправіць.

Пашырэнне набору

З 2015 мільёны мастакоў і мемаробаў карысталіся адкрытай платформай Telegram, каб распаўсюдзіць свае творы.

Вы можаце дадаць любы існуючы стыкер у свае наборы. Напрыклад, каб сабраць калекцыю сваіх любімых стыкераў у адным наборы, або проста зрабіць тэматычную падборку.

Абагуленне набораў

Каб абагуліць свае наборы іншым карыстальнікам, проста адпраўце адзін са стыкераў. Праз адзін стыкер, калі націснуць на яго, можна дадаць увесь набор. Кожны набор таксама мае ўнікальную спасылку t.me.

З гэтым абнаўленнем мы таксама дадалі папярэдні прагляд спасылак для ўсіх набораў стыкераў і эмодзі.

У гэтым месяцы мы плануем абвясціць яшчэ 16 новых магчымасцей, але спярша — хіба вы не збіраліся зрабіць парачку стыкераў?

13 красавіка, 2024,
Каманда Telegram